نوبات الغضب للطفل المدلل
من المواضيع اللي هواية الاهل يسالونة علية انو ميسيطرون على غضب طفلهم وكثر الصياح والعناد ويصيب الام بالاحباط
طبعا هنة موضوعين للطفل المدلل هذا الاول ☝️
ما هي نوبة الغضب💙
- نوبة الغضب تعتبر من السلوكيات المضطربة والمزعجة والاكثر شيوعا عند الاطفال
- يعتبر شي طبيعي (لاتخافون😉) لان هية محاولة الطفل التعبير عن نفسة
- بالعادة تبدي بعمر السنة ويروح بعمر ال ٦ سنوات
- تجي النوبة عادة تستمر من دقيقة الى دقيقتين ومرات تطول ساعات (تخيلو الوضع😨)
- تصير بالطفل الوحيد للعائلة بالعادة او الصغير (اخر العنكود) بس ترة هم تصير باقي الاطفال بس ذولة اكثر شي
مظاهر نوبة الغضب للطفل المدلل😅💙
بالعادة تجي حالة واحدة من الحالات اللي راح اذكرة او تجي اكثر من حالة مع بعض
- الصراخ المستمر ومرات يفشر ويتجاوز عالاهل والناس
- .رمي النفس على الارض (يعني يتمرغل بالكاع☹️)
- .ضرب الاشخاص او الاشياء القريبة
- .تكسير الغراض او الالعاب
- .نوبات البكاء او حبس النفس وتوصل مرحلة انو يزرق ويفقد الوعي 😨😨
اسباب نوبة الغضب💙
- عدم تلبية رغبات اطفل واعطاءه الشي اللي يريدة
- .تعب الطفل والنعاس والجوع
- .عصبية الاهل (خاصة الاب☹️) وكثرة الانتقاد والرزايل
- .التدليل الزايد
- محاولة الطفل ل لفت الانتباه لان ما مهتمين بي او عندة اخ جديد وانتو مهتمين بي وعايفينة
- .تعدد مصادر التربية (الطفل مشمر يومية بمكان يوم بيد الجد يوم بيد العمة يوم الخالة وهكذا ف مراح يتربة صح)
- .الطفل مصاب بامراض نفسية وجسدية يخلي يصرخ علمود يجذب نظر
علاج نوبة الغضب والوقاية منها
ثمانية عليكم (⚫️😊) و اثنين علينة (🔵😁)
- اولا تنطون الطفل الاهتمام والعناية الكافية(خوما صعبة) وحاولي تربي على ايدج انتي وزوجج خاصة اول سنة
- ثانيا تبعدون عنة الاشياء اللي تسوي نوبة الغضب (مثلا انتو حرامي من لعبة معينة تأذي 🤔 لازم تشيلوهة من كدامه نهائيا مو بس اللعب ترة الاكل هم ينطبق عليه هالشي)
- ثالثا لا تنحرجين من ابنج من يبجي ويتمرغل كدام العالم لو تلومين نفسج وتكولين فشلت بتربيتة بالعكس حافظي على هدوئج ولا تنطي اهتمام ابد مو تاخذج العاطفة
- رابعا ديري بالج تظربي راح تزيد الطين بلة وانما عوفي بس تاكدي ماكو شي قريب عل طفل يأذي نفسة بي😨
- خامسا استخدمي طريقة العقاب مثلا تزعلين علية او تعوفي في مكان وما تحجين ويا وحسب عمرة مدة العقاب تقريبا دقيقة لكل سنة عمرية (مثلا العمر ٣ سنوات يعني ٣ دقايق تعاقبي🤔)
- سادسا من تروح النوبة وترجعين للبيت تحجين ويا على تصرفة وابد لا تنطي مكافئة
- سابعا خلي الطفل ينام هواي وياكل زين تقلل من النوبة
- ثامنا انطي مكافئة اذا تصرف صحيح من يطلع وياج
- تاسعا هنا يجي دورنة الاطباء 😅 شوكت (اذا طولت النوبة اكثر من نص ساعة او تكررت ٣ مرات باليوم واذا اذة نفسة او الاخرين) لازم تجيبو علمود نجيكة ونفحصة احتمال ننطي علاج
- عاشرا اذا صار عندة فقدان وعي لازم تجيبو النة علمود نتاكد ماكو سبب اخر سوتله هالحالة
واخيرا صح الموضوع طويل ومزعج بس لازم تعرفون تفاصيلة لان متاكد اكثر الامهات يعانون من هالشي
وشغلة لخ بداية العلاج راح تزيد النوبة لان هوة راح يقاوم حتى ياثر على عاطفتج بس ويا الوكت راح يستجاب للعلاج
خليج قوية💪 وعندج ارادة💪 لان انتي دتصرفين بمصلحة الطفل 😊😊
والله يعينكم لان من اصعب الشغلات اللي حتواجهوهة😔😔😔
لهنا وصلنة نهاية الموضوع اتمنة نال اعجابكم💙
تحياتي
#الدكتور_محمد_هيثم_حباس
#اختصاص_طب_اطفال_وحديثي_الولادة
إرسال تعليق