السهر عند الاطفال موضوع يزعج الاهل ويقلقهم بنفس الوقت خاصة اللي اعمارهم فوق ال سنتين
يجيون الاهل يشكون يابة ابنه مينام اريدلة منوم 😔😔
على كيفكم يابة هسة نحجي شوي شوي العلاج وحاولو تطبقوو
علاج السهر
كلشي عليكم (⚫️😊) وشغلة بسيطة علينة (🔵)
- اولا تجنب اعطاء الطفل وجبة قبل النوم مباشرةً
- ثانيا عدم العب مع الطفل وتحفيزة قبل النوم (هاي سواف الاب يلعب مصارعة قبل النوم انتي ي الام لا تخلي 😅😅)
- ثالثا طفو الضوة وخلو الاجواء هادئة مال نوم وبرودة خفيفة
- رابعا حاولو تقرولة قصص خفيفة قبل النوم
- خامسا ممنوع شرب الشرابات المنشطة اللي تحوي على الكافايين مثل الببسي والجاي والكاكاو يعني اذا راد ولح حاول تخلوهن بالنهار
- سادسا قيلولة الظهر تخلوهة اقل من ساعتين وما تجاوز المغرب
- سابعا الحلويات والنساتل والجكليت والمعجنات اقل مايمكن وحاولو تمنعوهن بالمساء
- ثامنا تعويد الطفل على وقت النوم مثلا ب ١١ باليل تعلمو انو وقت النوم تطفون الانارة وحتى في بعض الاحيان انو تستلقون ويا وتظاهرون انتو حتنامون حتى ينام وراهة (وراهة عاد انتو كعدو وحظرو فلم السهرة والكرزات بدون الطفل😁😁 هاي اذا ماغفيتو ويا)
- تاسعا الموبايلات التلفزيون ال بلي ستيشن وجماعتهن تنسد قبل النوم ب ساعتين
- عاشرا مراسيم النوم تفريش الاسنان الذهاب الى التواليت ولبس ملابس النوم لازم تعلمو عليهن
- احدى عشر الاطفال اللي عدهم رهبة من الظلام او النوم وحدهم او يتخيلون شي موجود تفتحيلة ضوة خافت وتنامون يمة بداية النومة وتعوفو واذا تخيل شي شوفو المكان حتى يرتاح انو ماكو شي
- اثنى عشر انتهت حلول الارض الامر متروك النة الاطباء😅😅 تجيبو نفحصة نشوفة خاف يعاني من امراض نفسية او شي اخر ونقرر حسب الفحص الطبي احتمال ننطي دوة
لهنا وصلنة نهاية الموضوع اتمنة نال اعجابكم💙
تحياتي
#الدكتور_محمد_هيثم_حباس
#اختصاص_طب_اطفال_وحديثي_الولادة
إرسال تعليق