الاسهال هوة عرض وليس مرض يعني اكو سبب يؤدي الى الاسهال ويعتبر ثاني اهم سبب لوفيات الأطفال بالعالم ، والمشكلة عدنة العالم تستهين بي ومرات الطفل يروح من عدنة وماندري بسبب التراخي هذا فلازم احجيلكم شوية عنة😎
متى نقول أن الطفل عنده اسهال
اذا كان الخروج اكثر من ٤ مرات باليوم الواحد ويكون الخروج سائل او شبه سائل يعني مو شوي خف تعتبري اسهال
اسباب الاسهال
- الاصابة بعدوى فايروسية او بكتيرية او طفيلية
- الحساسية تجاه بعض انواع الاكل
- بعض امراض الجهاز الهضمي مثل مرض الحنطة او سوء الامتصاص
- بعض الادوية تسبب اسهال خاصة المضادات الحيوية
- اسهال تناضحي نتيجة السكريات والحلويات وشرب العصائر بكثرة
- اسهال التسنين وهذا بالعادة مراحل التسنين عند الطفل وراح نلاحظ زيادة كمية اللعاب من الفم وطبعا اذا حددنة وعرفنة سبب الاسهال عن طريق الفحص والتحليل حنكدر نعالج الطفل
الاخطاء اللي يقع فيها الاهل عند علاج الاسهال بسبب عدم الفهم او مراجعة الطبيب
١.الادوية القابضة
ال لوبرمايد وال دايا ستوب وال بكتا وشركات هواي طبعا من تاخذو حتلاحظون راسا يوكف الاسهال لان حيوكف الامعاء بس شراح تسوي حتسوي انتفاخ واذا كان اكو التهاب البكتريا راح تتكاثر وتنلاص الوضعية😔
٢.تقليل الرضاعة
من الاخطاء اللي توكع فيها الامهات تقلل رضاعة الطفل او كمية طعامه حتى يقل الاسهال وهنا انتي حتلوصين الوضعية ويطب مرحلة 😨 الجفاف 😨
3 - مطهرات الامعاء
بعض الصيدليات او مركز الطبية ينطون مطهر امعاء وهالشي راح يكتل البكتريا النافعة في الامعاء وراح يصاب الطفل بسوء الهضم لان كثر استخدامهة مضر للطفل
4 - المشروبات الغازية والعصاير
الاهل يضنون انو حتعوض الاسهال بالعكس حتزيد الاسهال عالطفل وتنلاص الوضعية
الوقاية والعلاج من الاسهال
- اولا واهم وحدة تنطون محلول الارواء الفموي اللي تعالج الجفاف وتعوض الاملاح اللي نفقدهة بالاسهال
- ثانيا الاستمرار بالرضاعة وابد لا تكطعيهة وخصوصا الرضاعة الطبيعية
- ثالثا تغيير نوع الغذاء للطفل ونخلي يعتمد اكثر على النشويات ك الرز والموز والبطاطة وتقليل الدهون
- رابعا شرب اللبن يعتبر من اكثر الفوائد للاسهال لان يحتوي بكتريا نافعة واملاح
- خامسا جدا مهمة☝️ نقلل من السكريات والحلويات (تعتبر صديقة الاسهال الاول☹️)
- سادسا يمنة الاطباء اذا جربتي الطرق السابقة وما فاد او صارت عندة اعراض جديدة (👇راح اذكرهن جوة 👇) لازم تجيبي نفحصة واحتمال ندزة تحاليل حتى نعالج السبب
- سابعا يمنة الاطباء بعد الفحص ممكن نغير نوع الحليب اذا كان صناعي ونستخدم حليب خالي اللاكتوز LF لفترة وراهة نرجع ال حليب الاصلي (هالشي نقدرة بالفحوصات)
- ثامنا يمنة الاطباء نستخدم ادوية البروبايتك وبعض الادوية اللي تساعد على بناء بطانة الامعاء
الحالات الخطرة وتحتاج رؤية طبيب في الاسهال
- تقيؤ مع الاسهال
- ارتفاع الحرارة (صخونة)
- وجع شديد في البطن
- اسهال يحتوي على دم
- ظهور علامات جفاف على الطفل (يعني تحسين عينة غائرة او يبجي بدون دموع او يقل الادرار او الطفل خامل
هذا ظروري تودي للطبيب ترة يضيع منج الطفل😨😨)
لهنا وصلنة نهاية الموضوع اتمنة نال اعجابكم💙🖤
تحياتي
#الدكتور_محمد_هيثم_حباس
#اختصاص_طب_اطفال_وحديثي_الولادة
إرسال تعليق