يعتبر من الشغلات الشائعة عند الاطفال والاهل يشكون منهة
ولا يعتبر مرض انما عرض طبعا اكثر الاهالي يغلسون ويكضوهة شراب ملينات او تحاميل مسهلة ويجاهلون انو يعالجون السبب
ما هو الإمساك
هو تأخر او صعوبة الخروج عند الطفل ويكون الخروج صلب كبير الحجم اكثر من المعتاد ومرات يصير ويا الم شديد اثناء مروره واحيانا بعض قطرات من الدم ومرات يكون مصاحب ال وجع في البطن قبل الذهاب للحمام
متى يمكن ان نعتبرة امساك
طبعا هالشي يختلف من طفل الى اخر وحسب العمر ونوع الاكل والحياة والبيئة
بس مرات كل ٣ ايام تطلع بطنة يعتبر طبيعي
او ٣ مرات تطلع بطنة باليوم هم طبيعي
بس اذا صارت ويا كبر حجم وكمية الخروج او صلابتة او الوجع عند الخروج او وجع البطن او دم مرافق للخروج او صعوبة الخروج بالرغم من العصر يعتبر امساك
اسباب الامساك
اكو اسباب غذائية او نمطية واكو اسباب مرضية
الاسباب النمطية كالتالي
- الرضاعة الصناعية ..الطفل اللي يرضع طبيعي يكون اقل عرضة للامساك من اللي يرضع صناعي لوجود مواد ملينة في حليب الأم
- التحضير الخطا للممة في الحليب الصناعي ووضع كميات كبيرة من الحليب بالنسبة للمي تسوي امساك (بعض الامهات عبالهة يسمن الطفل فتزيد الحليب 🤭)
- تغيير نوع الحليب اكثر من مرة وبوقت قصير ممكن يسوي امساك
- نوع الحليب اكو بعض الانواع تسوي امساك
- بعمر ٤ الى ٦ اشهر عند ادخال االطعام في غذاءة ممكن يسبب امساك لفترة قصيرة
- الطفل اللي يعاني من الاسترجاع او الاسهال يصير بي جفاف فيصير عندة امساك
- حرارة الجو وقلة شرب السوائل والاكل الغير الصحي اللي بي قليل الياف
- الكسل وقلة الحركة وعدم ممارسة الرياضة تسوي امساك
- الاطفال المعاقين وذوي الاحتياجات الخاصة واللي عدهم ضمور ممكن يصير عدهم امساك
- مرحلة التعويد على استخدام التواليت وترك الحفاضة ممن تسوي امساك بالبداية
- بعض الادوية ممكن تسوي امساك مثل الكالسيوم والحديد
- الطفل مرات هوة السبب انو يأجل الخروج ويغلس علية (احنة نكول يحصر بطنة) لان ملتهي بالالعاب او بالمدرسة او مكان عام وميحب يستخدم التواليت خارج المنزل يصير عندة تمدد المستقيم ويصير امساك
- جرح في الشرج او متعرض لاعتداء جنسي ممكن يسوي امساك
الاسباب المرضية كالتالي
- امراض الغدة الدرقية
- التليف الكيسي
- امراض الجهاز الهضمي
- مشاكل الحبل الشوكي
- تشوهات المقعد
- اكو اسباب جراحية وتعتبر طارئة
علاج الامساك
تسعة عليكم (⚫️😊) و ثلاثة علينة (🔵😉)
- اولا الرضاعة الطبيعية اكثر شي يقلل الامساك والام خلي غذائج يحتوي فواكه وخضروات
- ثانيا في حالة حليب القواطي التزمي بطريقة التحضير مو تغلسين وتحطين حليب زايد ، ولا تغيرون الحليب كل فترة
- ثالثا الاطفال الرضع اللي يستخدمون حليب القواطي سوولهم تمارين الساق ، تدليك البطن خاصة المعدة ، شرب الماء ، السبح بماء دافي واذا لابسين خفيف لازم يكون اللبس معقول لا يبردة ولا يحررة ، وتكون اجواء البيت برودة خفيفة
- رابعا شجعو الطفل عالرياضة والحركة💪
- خامسا عودو الطفل عالغذاء الصحي الغني بالالياف والسوائل والعصير الطبيعي🍎🍐🍉🥒🍑
- سادسا التعويد على استخدام الحمام بكل مكان وما يحصر بطنة
- سابعا بعض الفواكه والملينات الطبيعية تكدرين تستخدمين مثل التين ، المشمش ، الزبيب ، البطيخ الزلاطة و العصائر الطبيعية
- ثامنا قللي من الاكل الدسم اللي يسوي امساك مثل الرز والبطاطا وغيرها
- تاسعا شغلات العجايز مال قبل تحفيز المقعد بالصابون استخدام عود الاذن او الشخاط او من هاي السوالف عوفوهن رجاءا لان مرات تسوي مضاعفات وتحسس وضررها اكثر من نفعهة
- عاشرا مراجعة الطبيب لصرف الملينات ومراقبة حالة الطفل وعدم الاكثر منها
- احدى عشر الفحص الطبي والسريري للطفل من قبل الطبيب في حالة كون الحالة مزمنة من اجل تشخيص الحالة المرضية لان هواي اكو اسباب مرضية
- اثنى عشر زيارة الطبيب لمعالجة الديدان او التهاب المجاري البولبة لان تعتبر سبب للامساك
🖤💙لهنا وصلت نهاية الموضوع اتمنة نال اعجابكم💙🖤
تحياتي
#الدكتور_محمد_هيثم_حباس
#اختصاص_طب_اطفال_وحديثي_الولادة
إرسال تعليق