موضوع طويل جدا ولازم نحكي بالتفصيل واتوقع عندي اذا تسالني من اهم المواضيع يعتبر☝️☝️
وهالموضوع هواي الاهل يسالونة دكتور ابني كان مابي شي ورضاعتة كلش زينة وعلى غفلة كام ميرضع 😷
دكتور ابني اكلة كلش زين وكعد اليوم ولا قطعة اكل يحط بحلكة تكول عبالك صايم😔
او الام طفلهة كان يرضع طبيعي وصناعي وعاف الطبيعي وجلب بالممة
طبعا عدة اسباب اكو متعلقة بالطفل واكو بالام واكو متعلق بالرضاعة الصناعية
اسباب امتناع الطفل عن الرضاعة او الاكل متعلقة بالطفل
- مرض الطفل : اصابة الطفل بالزكام(الرشح) واحتقان الأنف مما يعيق عملية التنفس تعتبر سبب كافي انه يرفض الرضاعة سواء طبيعي او صناعي.
- -شعور الطفل بالألم وعدم الراحة : اما بسبب التسنين او تقرحات الفم او التهابات الأذن او حتى بسبب اللقاحات
- اصابة الطفل بالامساك يؤدي الى فقدان الشهية
- حساسية الطفل تجاه الأطعمة اللي تاكلها الأم يعني طعم حليب الام يتغير مرات ب اصناف من الاكل والطفل ميعجبة الطعم فيرفض الرضاعة
- وضعية الرضاعة غير مريحة للطفل
- توتر الطفل او وجود شي يشتت انتباهه
- مرات يرفض الرضاعة من ندخل اكل صلب للغذاء مالتة لان هالشي راح يملي معدة الطفل وتسبب الاشباع فترات طويلة مو مثل الحليب راسا ينهضم
- اختيار وقت الرضاعة غلط ..مثلا الطفل يريد ينام ..او الام بعيد عنه لوقت طويل وجيتي تردين راسا ترضعي هنا الطفل راح يرفض لان هوة اصلا زعلان وضايج منج (ترة الطفل حساس انتبهو😅)
اسباب متعلقة بالأم
- رائحة الأم : الطفل حساس جدا ، وعنده القدرة على تمييز رائحة امه ..لذلك اي تغيير في ريحه الام نتيجة استخدام صابون جديد او عطر او كريم ممكن تخليه يستغرب وينفر من الرضاعة
- تغير مذاق الحليب نتيجة الطعام اللي تاكلة الام او بعض الادوية او التغيرات الهرمونية مثل الدورة الشهرية او الحمل مرة تانية ممكن تخليه يرفض الرضاعة
- الاصابة بالتهاب الثدي او الحلمة: وهالشي يخلي طعم الحليب مالح نتيجة ارتفاع نسبة الصوديوم بي
- الحالة النفسية السيئة للأم كفيلة انو تغير طعم وجودة الحليب و بالتالي يرفض الطفل للرضاعة
- استخدام كريم تشققات للحلمات سواء للعلاج او للوقاية وعدم تنضيف الصدر منه قبل الرضاعة ممكن يكون طعمه غير مستحب للطفل.
- شكل الحلمة ممكن يكون غير مريح للطفل اثناء الرضاعة يعني حلمة كبيرة او حلمة غير بارزة (طامسة) ميكدر الطفل يرضع منهة
اسباب متعلقة بالرضاعة الصناعية
- عدم ملائمة نوع الحليب للطفل
- درجة حرارة الحليب غير مناسبة للرضاعة بارد او حار
- رائحة ديس الممه كريهة يعني ما منظفة زين او عتيكة
- استخدام ديس ممه او حلمة ممة لنوعية رديئة الصنع تكون حلماتها صلبة او قاسية
- تكون حلمة الممه غير ملائمة لعمر الطفل يعني كبيرة او صغيرة الحجم او زرف الحلمة كبير او صغير تؤدي صعوبة الرضاعة فيرفضها
علاج توقف الرضاعة
ثمانية عليكم (⚫️😊) و اثنين علينة (🔵😉)
- اولا لازم نبدي ب علينة لان لازم تعرضون الطفل على الطبيب لفحصه والتأكد من سلامته
- ثانيا معالجة الامراض واحتقان الانف ان وجد
- ثالثا الابتعاد عن الاطعمة اللي تغير طعم الحليب مثل البصل والثوم والفلفل والبهارات
- رابعا الاكثار من اكل الفواكه تنطي طعم طيب للحليب
- خامسا العناية بنظافة الثدي والابتعاد عن العطور القوية وعلاج التهابات الثدي ان وجدت وحل مشكلة الحلمة الطامسة بواسطة بعض التمارين
- سادسا اذا بدينة بالاكل الصلب نكدر نخلطة مع حليب الام او الحليب الصناعي.
- سابعا ابتعدي عن التوتر والمشاكل وخليج ريلاكس
- ثامنا اختاري وقت مناسب ومكان هادي ووضعية مريحة للرضاعة
- تاسعا بالنسبة للرضاعة الصناعية غيرو الحلمة او ديس الممه كل فترة لان تصير بيهة فطريات او رائحة
- عاشرا درجة حرارة الحليب خليهة مناسبة
لهنا وصلنة نهاية الموضوع اتمنة نال اعجابكم💙
تحياتي
#الدكتور_محمد_هيثم_حباس
#اختصاص_طب_اطفال_وحديثي_الولادة
سوو شير ولايك حتى يستفاد الجميع
إرسال تعليق